近年學界積極推行STEM教育，九龍樂善堂主辦嘅「第一屆關懷弱勢社群—全港創新科技大賽」，中、小學參賽隊伍有超過100隊，只有15隊入圍，競爭咁激烈，認真唔可以睇少佢哋！

今次嘅比賽主題係「關懷弱勢社群」，推動創新科技教育之餘，仲傳遞關懷身邊有需要人士嘅信息；同日仲舉辦咗頒獎禮，黛安覺得同學仔個個唔單止有創意，仲好關心社會！樂善堂楊仲明學校就以「順手牽杖‧智能手杖」贏得小學組冠軍，智能手杖可以自動亮起LED燈照明，如果長者跌親或者使用緊急掣，就會發出求救訊號引起途人注意，仲可以話畀屋企人知長者返到屋企，非常實用。

隊員曾作分享話，佢哋當初係上網睇資料，見到好多關於老友記嘅意外新聞，所以諗到呢個設計，仲特登去老人院收集意見，改良咗3次後，終於解決咗光感度不足嘅問題，成功以低成本接近300元研製出智能手杖。

另外，何明華會督銀禧中學就以「鄰‧倚」奪得中學組冠軍，參賽學生柯卓彥話，因為睇電視見到輪椅人士落斜坡要倒後落，唔方便之餘又危險，令佢哋萌生設計配件幫輪椅人士，用咗4個月時間設計和研製，部分配件亦都用3D打印技術製作。

出席頒獎禮嘅教育局局長楊潤雄話，希望透過比賽幫到長者、失明和行動不便嘅人士，改善生活質素，培養學生正面價值觀。

文章來源：Skypost

https://skypost.ulifestyle.com.hk/article/2410210/%E6%A8%82%E5%96%84%E5%A0%82%E8%BE%A6%E9%A6%96%E5%B1%86%E5%89%B5%E7%A7%91%E5%A4%A7%E8%B3%BD%20%E5%89%B5%E6%84%8F%E7%99%BC%E6%98%8E%E5%8A%A9%E5%BC%B1%E5%8B%A2%E7%A4%BE%E7%BE%A4

圖片來源：Skypost